გამომცემლობა “დიოგენე”, 2009
ავტორები: მანანა და ქეთევან აბრამიშვილები
თამთა გურგენიძის მონაწილეობით
ფიგურები პლასტელინისგან გამოძერწეს ია გიგოლაშვილმა და ნანა მელქაძემ.
გამომცემლობა “დიოგენემ” საოცარი საჩუქარი გაუკეთა ჩვენს შვილებს. ესაა ახალი საბავშვო წიგნი “მოდით, მოდით, ბავშვებო!”
საოცარია ის რაც წიგნში ხდება!
ილუსტრაციები,რომლის თვალიერებაც ჩვენს პატარებს ასე ძალიან უყვართ, ჩვეულებრივი კი არაა, პლასტელინისგან გამოუძერწავთ. წიგნში ბავშვებთან ერთად წავიკითხავთ ლექსებს, მოთხრობებს. ენის გასატეხებს და გამოცანებსაც ვისწავლით, საინტერესო ამბებსაც გავიგებთ და საბავშვო პიესის მიხედვით წარმოდგენაც კი შეიძლება დავდგათ. ჩემმა ვაჟმა ძალიან იხალისა “მარწყვიყლაპია ტორტის ამბავი” რომ წავიკითხეთ, და გაოცებული აკვირდებოდა მარწყვებით მორთულ პლასტელინის ტორტუნას... გამოცანების გამოცნობა კარნახის გარეშე ჯერ ცოტა გვიჭირს. ჰოდა, აქაც პლასტელინის ილუსტრაციებმა გვიშველა: ჭიამაია და მარწყვი, პეპელა თუ ფუტკარი, ძროხა, ვაშლი, ტელეფონი – ყველა გამოვიცანით!
ეს წიგნი მართლა საუკეთესო გასართობი გახდება პატარებისთვის. ჯერ ერთი იმიტომ რომ ახალი, ქართული და თანამედროვე წიგნია. და რაც მთავარია, მანანა და ქეთევან აბრამიშვილების მიერ დაწერილი ლაღი, სახალისო და საინტერესო ამბები და პატარებისთვის ტკბილ და გასაგებ ენაზე სათქმელი ლექსები თუ გამოცანები, დარწმუნებული ვარ, შეუყვარდებათ ჩვენს შვილებს. ია გიგოლაშვილისა და ნანა მელქაძის პლასტელინის ფიგურები კი პატარა შემოქმედებს მოხიბლავს და შთაგონებასაც მისცემს. ამაში თავად დავრწმუნდი, როცა თბილისის წიგნის ფესტივალზე “დიოგენემ” ბავშვებს ნამდვილი დღესასწაული მოუწყო – ბევრი პლასტელინი, საძერწი დაფები, ბუშტები... ბავშვები წიგნის მიხედვით და საკუთარი ფანტაზიის ხელმძღვანელობითაც, რა თქმა უნდა, ძერწავდნენ “მოდით, მოდით, ბავშვებო”-ს პერსონაჟებს და ძალიან კარგადაც გამოსდიოდათ!
No comments:
Post a Comment